Gipuzkoako Foru Aldundiko Kultura eta Lankidetza Departamentuak, Mestiza Elkarte Artistiko-soziokulturalaren laguntzarekin, Bookstart Euskadi-Gipuzkoa programaren laugarren edizioa jarri du abian.
"Irakurri, hitz egin, abestu eta jolastu" lelopean, irakurzaletasuna sustatzen jarraitu nahi dute aurkeztutako programarekin. Guztira 1.000 liburupack banatuko dira, Gipuzkoako 9 herritan. Ordiziak 2022an egin zuen bat proiektuarekin, eta aurten Idiazabal, Ataun eta Legorreta batu dira.
Liburuak 0 eta 3 urte bitarteko adingabeentzat izango dira, eta biztanle gutxiko herrietan 5 urtera arteko haurrentzat ere zabalduko da ekimena.
Adin tarte horietako haurrak dituzten etxe guztiek gutun bat jasoko dutela posta arruntez eta bertan udal liburutegira edo Haurreskolara gonbidatuko dituzte liburupacka jaso ahal izateko. Sorta bakoitzak euskarazko, gaztelaniazko eta ingelesezko liburu bana izango du.
Bookstart Euskadi-Gipuzkoa programa Liburu Baby Klubaren saioekin osatzen da. 0-5 urte bitarteko haurrak dituzten familientzako ekimena da hau, lehen haurtzarotik liburuen bidez lotura afektiboa sustatzeko. Parte hartzen duten udalekin lankidetzan, saioak egingo dira lurraldeko hainbat tokitan.