Duela aste batzuk, Aralar kudeatzeko hamar urterako Plan Orokorra adostu zuten Gipuzkoako Foru Aldundiak eta Enirio-Aralar Mankomunitateak.
Ondorioz, Aralar Bizirik Plataformak eta Landarlan Ingurumen Elkarteak salatu dute alderdi politikoek akordioa eztabaidatu gabe eta partaidetza prozesurik gabe sinatu dutela.
Bi erakundeek diote, akordio horren bidez abeltzaintzak lehentasuna izango duela natur kontserbazioaren gainetik, Parke Naturalaren helburuen aurka joz. Horrez gain, Lurralde Oreka Berdea departamenduak, produktibista-merkantilistaren alde gehiago jotzen duela salatu dute.
Akordioko eduki batzuk, berme zientifiko eta juridikorik ez dutela erreklamatzen dute, besteak beste, Natura-Ondarea kontserbatzeko Legearen kontra doazelako. Bertan, landa-eremua eta mendia bereizten ez direla azpimarratzen dute eta Enirio-Aralar herri bateko landa eremua balitz bezala ezin dela kudeatu.
Akordioan, abereak larratzeko aldia luzatzea proposatzen da, eta, horrez gain, sastrakak erretzeko eta herbizidak erabiltzeko aukerak zabaltzen dira. Halaber, Arritzaga, Elutseta eta Pagabera inguruan hiru pista berri egiteko konpromisoa jasotzen da. Guzti honek mendiaren artifizializazioa eta kutsadura areagotzea ekar dezakeela defendatu dute.
Herri eta udal batzetan akordio osoa ezagutarazi eta eztabaidatzea eskatzen dute bi elkarteek, naturaren kontserbazioan eta Mankomunitatearen funtzionamendu demokratikoan atzera pausua izango dela salatuz.