Udalak, Beasaingo gaur egungo etxebizitzaren egoera aztertzen duen diagnostikoaren emaitzak aurkeztu ditu. Bertan, errolda eta kontsumoen azterketa eginda, 252 etxebizitza huts daudela identifikatu dute. Etxebizitza hauen erabilera optimizatzea eta arrazoizko alokairu eskaerari erantzutea da diagnostikoak erakusten duen premia. Izan ere, iaz 294 beasaindarrek eskatu zuten etxebizitza babestua Beasainen eta horietatik % 78,2a alokairuko etxebizitzaren bila ari da orain.
Egoera ikusita, Udalak etxebizitza hutsak mobilizatzeko neurriak bultzatuko ditu. Alde batetik, etxebizitza hauen jabeei, alokairua sustatzeko programen berri eman eta birgaitze laguntzen informazioa indartuko zaie. Horrez gain, datozen hilabeteetan esku-hartze zabalagoak egingo diru Udalak.
Eremu tentsionatutik kanpo
Eusko Jaurlaritzako Etxebizitza Behatokiak eremu tentsionatuen zerrenda berritua plazaratu du. Goierriko bailaran, Ordizia, Beasain eta Lazkaoko udalerriek eskaera eginda zuten. Ordiziak adibidez, prozesu honetan lehenengo urratsak eman zituen urte hasieran, etxebizitzari buruzko diagnostikoa eginez. Hala ere, argitaratu berri duten txostenean, hiru udalerri hauek gune tentsionatu izendatzeko baldintzak betetzen ez dituztela azaldu dute.
Tentsio handiko eremu izendapenaren helburua, alokairu prezioen igoeraren aurrean, erakundeek esku hartu ahal izatea da. Eusko Jaurlaritzaren txostenaren arabera, hiru dira gune-tentsionatu izendatu ahal izateko irizpide nagusiak: 2018-2023 artean alokairuen errenta %19,6-tik gora igotzea, salerosketa prezioa %22,4-tik gora igotzea eta etxebizitzaren hipoteka edo alokairuaren gastua familiaren diru-sarreren %30 baino handiagoa izatea.