Zer dio legeak?
Jabetza Horizontalaren Legearen 17. artikuluan azalpen argia ageri da, bere 5. puntuan: “Eraikineko aparkalekuan erabilera pribaturako ibilgailu elektrikoak kargatzeko puntu bat jartzeko, aldez aurretik komunitateari jakinarazi baino ez da egin beharko, baldin eta aparkaleku hori garaje-plaza indibidual batean badago. Instalazio horren kostua eta dagokion elektrizitate-kontsumoa instalazioko zuzeneko interesdunek hartuko dituzte beren gain”. Bestela esanda, auto elektrikoaren jabeak ez du bizilagunen baimenik behar. Haiek jakinaren gainean jartzea, hori da legeak jartzen duen betebeharra. Ez gehiago. Hori bai, kargarako aparailua garaje-plazan bertan jarri behar da. Aparkalekua bi marren artean zehazturikoa bada, eremu horretan bertan jarri behar da aparailua.
Behin ibilgailua erosita, zein da hurrengo urratsa?
Kontzesionarioan erosiz gero, saltzaileak berak saltokian bertan jaso ohi ditu irizpideak. Kotxearen jabea baimendutako instalatzaile batekin jartzen dute harremanetan eta honek, ohikoan, lehen behaketa lana egiten du, garajean bertan, instalakuntzari ekin aurretik. Gutxi-asko, 1.900 eurokoa da aparailuaren instalakuntza-gastua. Orain arte, ia gastu osoa dirulaguntzen bidez finantzatu ahal izan da. Estatuan, esaterako, orain arte indarrean izan da Moves Plana (Plan Moves) delakoa. Plan horren arabera, erosle partikularrak instalakuntza-gastu osoaren %70eko dirulaguntza jaso zezakeen. Eta, Renault etxearen kasuan adibidez, kontzesionarioak berak gainerako %30a finantzatu ohi du.
Zer da MOVES plana?
Espainiako Gobernuaren laguntza-programa, ibilgailu elektrikoak erosteko eta horiek kargatzeko guneak instalatzeko. Karga-puntua instalatzeari dagokionez, partikularrak, bizilagun-komunitateak, administrazio publikoak, autonomoak eta enpresak izan daitezke onuradunak. 2025ari dagokion plana onartu gabe dago oraindik. Denbora-tarte honetan, hutsune hori gainditzeko, Eusko Jaurlaritzak sei hilabetez luzatu du laguntza-lerroa, eta, beraz, Euskal Erkidego Autonomoan 2025eko ekainaren 30era arte egongo da indarrean. Mikel Amundarain Energiaren Euskal Erakundeko zuzendari nagusiaren ebazpena 2024ko abenduaren 31ko EHAAn argitaratu zen. Eusko Jaurlaritzak egun haietan zabaldu zuen oharraren arabera, “Euskadik garaiz eta behar bezala lortu du mugikortasun elektrikorako laguntza nagusiek indarrean jarraitzea 2025eko lehen seihilekoan, eta, hala, mugikortasun iraunkorra sustatzen jarraitzea”.
Ezohiko egoerak sortu dira
Artikuluaren lanketan gabiltzala kasu deigarri batekin egin dugu topo. Aurkitu dugu kotxe-elektriko bat kalean, zoru publikoan, etxe batetik datorren kable luze batetik kargatzen ari dena. Karga-puntutik ibilgailurainoko distantzian, tartean, belardia eta espaloia daude. Horrelako kasuetan posible da karga egitea? Errealitate berria da auto-elektrikoena eta horrek ez ohiko egoerak sortu ditu. Deskribatzen ari garena horietako bat da. Antza, hori gertatzen ari den herriko udaletxean galdetuta, kasu zehatz horretan ibilgailuaren jabeak ez luke karga modu horretan egiteko baimenik izango.
