Goierritarrok egunero mugitzen gara batetik bestera, zeregin honetara edo hartara. Pertsonok mugitzeko arrazoi ezberdinak ditugu, eta hauek aldatu egiten dira, gainera, adinaren edota generoaren arabera.
Desplazamendu gehienak, Goierri barruan
Eta nora mugitzen gara goierritarrak? Bada, desplazamendu gehienak eskualde barruan egiten ditugu.
Eskualde barneko mugimendu horien gehiengoa, halaber, udalerri barrukoa da. Hala da Gipuzkoa osoan.
Garraio publikoa, Gipuzkoan barrena mugitzeko
Herritik kanpora joan behar dugunean, orokorrean autoa erabiltzen jarraitzen dugu. Garraio publikoaren erabilera, logikoki, konexioek baldintzatzen dute. Hala, batik bat Gipuzkoa barruan erabiltzen da: gehien bat Goierri barruan edota Tolosaldera mugitzeko.
Garraio publikoaren erabilerak goranzko joera du EAE mailan, baita Goierrin ere. Hala ikusten da garraio txartelen erabileran.
Azken urtean Lurraldebuseko bidaiek gora egin dute. Goierrin %15 egin du gora bidaia kopuruak 2023 eta 2024 artean. Linearik erabiliena GO01 da (Zegama>Segura>Idiazabal>Olaberria>Beasain>Ordizia>Zaldibia), 403.282 bidaiarekin.
Hala ere, esan bezala, ibilgailu pribatuek pisu handia dute oraindik Goierrin. Argi antzeman daiteke hori gure herrietako ibilgailu parkeari erreparatuta. Olaberria edota Araman, esaterako, biztanleko bi ibilgailu daude (ibilgailu mota guztiak kontuan hartuta).
