220 nekazalturismo, landetxe eta landa-apartamentu baino gehiago biltzen dituen Nekatur landa-ostatuen elkarteak, Batzar Nagusia ospatu zuen atzo Azpeitian.
'Nekaturreko jardunbide egoki jasangarriak' diplomak banatu ostean, 'Nekaturreko enbaxadorea' errekonozimenduaren lehenengo edizioari ekin zioten. GOITUR, Goierriko Turismo Agentziak gure eskualdean turismoa garatzeko egin duen 25 urteko lana eta ahalegina aitortzeko eta Nekaturrekin izan duen lankidetza eskertzeko, 'Nekaturreko Enbaxadore' izendapena jaso zuen.
'Enbaxadore' izendapena Euskadiko landa-ostatuaren eredua eta landa-ingurumena bere dimentsio sozial, ekonomiko eta jasangarrian indartzen duten pertsona eta erakundeen lana aitortzeko helburuarekin sortua da.
Goiturreko zuzendari Niko Osinaldek eta Ion Ubide teknikariak jaso zuten aipamen berezia: "GOITUR, Euskadin sortutako lehen erakunde publiko-pribatua, 2000. urtean sortu zen, kalitatean, irisgarritasunean eta berrikuntzan oinarritutako hainbat plan pilotu martxan jarrita. Horrela, 25 urte hauetan zehar, Goierriko sektore pribatua indartzeko lehiakortasun plan ezberdinak landu ditu, eta aldi berean, eskualde hau sustatu eta merkaturatzeko hainbat produktu turistiko sortu ditu. Erreferentziazko erakundea denez, Euskadiko beste leku batzuei eta hainbat herrialdetako beste eskualde batzuei aholkatu die."