Goierriko eta Nafarroak EAJko ordezkariek agerraldia egin dute Ezkioko AHTaren geltokian Euskal Y-aren konexioa Ezkiotik egin dadin aldarrikatzeko. Bertan izan dira Leire Artola, Kepa Zubiarrain, Jon Luqui eta Eric Galvez Beasain, Lazkao, Urretxu eta Legazpiko alkateak; Javier Leoz, Joseba Aranburu eta Josu Idigoras Iruñea, Ordizia eta Zumarragako zinegotziak eta Idiazabal, Zegama, Zaldibia, Ataun eta Legorretako ordezkariak, besteak beste.
“Trenbide-azpiegituraren eta erabiltzaileen zerbitzuaren ikuspegiari dagokionez, aukera eraginkorrena" dela frogatu dela adierazi dute agerraldian, "bai funtzionaltasunari dagokionez, bai ingurumenaren ikuspegitik".
Eskualdeko herritarrak, hiriburuetatik 30 minutura
EAJko ordezkariek azpimarratu dutenez, Ezkioko geltokiak “intercity” tren zerbitzuen bidez eskualdeko herritarrak 30 minutu baino gutxiagoan Hegoaldeko hiriburuekin (Bilbo, Donostia, Gasteiz, Iruñea) lotuko ditu, Gainera, merkantzien garraioak bertako industriarentzako ekarriko duen lehiakortasun-hobekuntzari ere garrantzia eman diote. Nabarmendu dute "trena etorkizuna dela eta, beraz, azpiegitura moderno eta lehiakor bat behar dugula; pertsonak hurbildu eta konektatzeko ez ezik, gure errepideak zama astuneko trafikotik arintzeko ere".
Ezkioko azpiegitura, funtsezkoa
Bertaratutakoek "Ezkioko azpiegitura geltoki-fantasma bihurtuko dela" dioen "desinformazio-kanpaina" salatu dute. Izan ere, Ezkioko azpiegituraren beharra Nafarroarekiko konexioa nondik egiten den zehaztetik harago doala adierazi dute. Gogorarazi dute Euskal Y-ak tren-maniobrak zehatzak egiteko lekua behar duela eta Ezkioko geltokia horretarako funtsezkoa dela, "Trenen Aurreratze eta Aparkaleku Postu gisa funtzionatuko baitu". Era berean, Eusko Jaurlaritzak, Euskotrenek eta Euroeskualdeak etorkizuneko ustiapenaren inguruan egindako analisietan "intercity" zerbitzuek Ezkioko geltokian geldialdia egitea aurreikusten dela gogorarazi dute.