Beasain eta Lazkao udalerrien arteko N-I errepideko 419 lotunean, Senpereko biribilgunean, Donostiarako norazkoan sartzeko eta irteteko bide-adarrak itxiko dira igandean, urtarrilaren 19an.
Bertan bide segurtasuna hobetzeko hainbat lan egingo dira. Gipuzkoako Foru Aldundiak ohar batean azaldu duenez, inausketa eta mozketa lanak egingo dira bertako landaredia kentzeko. Gainera, lotuneko irlatxoan metalezko hesia jarriko da, bertako belar eta sastrakak kentzearekin batera.
Ordezko ibilbideak
Bide-adar hauek 7:00etatik 18:00etara itxi egingo dira eta bitarte horretan hauek dira proposatutako ibilbideak.
Donostiarako noranzkoan N-I errepidera sartzeko ordezko ibilbide gisa GI-3560 errepidea, Olaberrian barrena, erabiltzea aurreikusten da, edo, GI-4491 errepidea, Ordizian barrena.
Gasteiz-Irun noranzkotik datozela N-I errepidetik irten eta Lazkaora joan nahi dutenentzat, 417 lotunean, Castilloko lotunea, irtetea proposatzen da, eta GI-3560 errepidea erabiltzea Olaberria zeharkatuz Lazkaora iristeko, edo Beasaingo zeharbidetik joatea.