Larunbatean, goizeko 7:00etan, Larraitzeko aparkalekutik abiatu ziren korrikalariak. Guztira 19 parte-hartzaile izan ditu probak aurten, Uxue Fraile emakume bakarra izanik. Egun osoan zehar, haizea eta hotza izan ziren protagonista.
Irteeratik Txindoki mendiko Marizulo kobazulora abiatu ziren, hortik Aralarko mendilerroa gurutzatzen hasteko. Euskal Mitologia oinarri duen lasterketa honetan, Marizuloko, Lezaundiko eta Altzaniako mendilerroko haitzuloetatik igaro behar ziren korrikalariak.
Lasterketa osoan zehar, Angel Garcia buruan kokatu zen, Pablo Angulo, iazko irabazlea, atzetik zuela. Gainerako parte hartzaileak atzetik zituzten, baina distantzia handiagoarekin.
Azkenik, Angel Garcia (raid eta orientazioko BTTn aditua) izan zen probako irabazlea. Parte-hartzaile bakarra izan zen, antolakuntzak ezarritako 12 orduak baino lehenago lasterketa amaitzen.
Pablo Angulok ere lortu zuen helmuga gurutzatzea, 12 ordu eta 59 minututan, 95 kilometro egin ondoren. Oraingoan denboraz kanpo iritsi arren, iazko edizioko irabazlea izanik, bi Mariren Kobak Trail osorik burutzea lortu duen pertsona bakarra izan da.