Eguzkia irten baina lehenago, goizeko 7:00etan, irtengo dira korrikalariak eta antolakuntzak ordu laurden bat lehenago emandako mapei esker, hainbat koba lotu eta helmugara iritsi beharko dute 12 ordutan. Ibilbideak, 80 km-ko luzeera eta 4.700 metroko desnibela izango du.
Behin irteera emandakoan parte hartzaileen mugikorrak zigilatuko dira eta bakoitzak nahi duen ibilbidea egin dezake, beti ere koba horietatik pasa eta bertan egongo diren egiaztagiri harriak hartu ezkero.
Lasterketak badu berezitasun batzuk. Euskal mitologiaren antzinako legeak jarraitu behar dute parte hartzaileak. Mariri ezingo zaio inoiz bizkarra eman, hau da, kobazulotik sartzen den era berean atera behar da, hikan hitz egin beharko zaio eta ezingo zaio inoiz begietara begiratu.
Beste arau berezi batzuk ere baditu. Korrikalariek derrigorrez eraman behar dute gainean txorizo, saltxitxoi edo antzekoren bat eta Mari jainkosaren aurrean elegante agertzeko, alkandora bat eraman beharko dute jantzita.
Irteera puntuan emakume bakarra eta 19 gizonezko egongo dira bigarren edizio honetan. Parte hartzaileen artean iazko irabazlea egongo da, Pablo Angulo getxotarra. Iaz, 11h eta 30' behar izan zituen lasterketa amaitzeko eta helmugara iritsi zen parte hartzaile bakarra izan zen.
Korrikalari entzutetsuak ere egongo dira, besteak beste, Uxue Fraile, Iker Karrera, Genís Zapater edo Zigor Iturrieta.
Iazko edizioko irudiak: