Ostiralean eman zioten hasiera Gipuzkoako Herriarteko Pilota Txapelketari. Aurten Goierritik, Beasain, Zaldibia, Ataun eta Idiazabalek hartuko dute parte eskuz pilotan eta Ordiziak pala modalitatean. Gipuzkoako txapelketan guztira 41 herritako 443 pilotarik hartuko dute parte eta kanporaketak joan-etorrikoak izango dira.
Ostiralean, goierritarren arteko lehia izan genuen, izan ere, Zaldibia eta Idiazabalek elkarren aurka jokatu zuten lehen kanporaketan, Zaldibiako Resti frontoian.
Hiru adin mailatan lehiatu ziren. Alde batetik, kadete zaldibiarrek 22 - 5 irabazi zuten, ondoren jubenilek 22 - 11 egin zuten, eta azkenik, afizionatu mailan, 22 - 5 amaitu zuten. Emaitza hauekin, Zaldibiak abantaila handia lortu du 3 mailatan irabazita. Hala ere, datorren asteburuan itzulerako jardunaldia jokatuko dute, kasu honetan Idiazabalen.
Beasainek ere jokatu zuen lehen kanporaketa fasea. Kasu honetan Tolosa jaso zuen Antzizar pilotalekuan. Beasainen kasuan, kadeteek 12 - 22 galdu zuten partida. Hala ere, beste bi partidetan etxekoak gailendu ziren. Juniorrek 22 -14 amaitu zuten, eta afizionatu mailan, partida parekatu baten ostean, 22 - 21 irabazi zieten tolosarrei.