Digitalizazioaren aroan gaudela oso nabaria da banketxeen munduan. Bezeroek geroz eta gehiago jotzen dute banketxearekin egin beharreko gestioak online egitera; erosotasunagatik batetik, baina baita banketxeek beraiek horretara bultzatzen gaituztelako.
2008tik hona bulegoak ixten joan dira entitate gehienak, arrazoi ezberdinengatik. Kutxa eta bankuen arteko fusioak alde batetik, eta zerbitzuak bulego bakarrean zentralizatzeko joera bestetik. Adibidez, lehen Kutxabankek Beasain edota Ordizian bina bulego bazituen, bana du orain.
Goierriko bulegoen %32 itxi dituzte
Goierrin 38 bulego zeuden guztira 2008n, Espainiako Bankuaren arabera. 2023n, aldiz, 26 ziren.
Bulego gehien galdu dituen herria Beasain izan da. Hamabost bulego izatetik zortzira pasa baita, ia erdia. Lazkaon lau bulego izatetik bi izatera pasa dira, Espainiako Bankuaren arabera, Banco Santander eta BBVAko bulegoak galduta. Hala ere, Lazkaoko Elosegi kaletik pasatzen denak BBVAko bulegoa ikusiko du bertan, zabalik. Bulego berezia da baina. BBVAko ikurrak izan, eta banketxe honen produktuak eskaintzen baditu ere, ez da BBVAren bulego ofiziala. Langile autonomoek eramaten dute bulegoaren eta bertako bezeroen kudeaketa. Berdin gertatzen da Zegaman ere. Bertako langileek adierazitakoaren arabera, kudeaketa beren gain hartu ez balute, itxita leudeke Lazkao eta Zegamako BBVAko bulegook.
Herri handiak, bulego gehien galdu dituztenak
Herri handienetan nabaritzen da bulegoen itxiera gehien. Txikiagoetan banketxeek zabalik mantendu dituzte, nahiz eta egunero irekitzen ez dituzten. Asteko egun jakinetan eskaintzen dute euren zerbitzua Segura edo Ormaiztegi bezalako herrietan.
Zortzi herri bulegorik gabe
Gainera, Goierrin zortzi herri daude inongo entitateren bulegorik gabe: Altzaga, Arama, Gabiria, Gaintza, Itsasondo, Mutiloa, Olaberria eta Zerain. Hauetako batzuetan kutxazainak dituzte, Itsasondo edota Gabirian esaterako. Hala ere, Mutiloan kutxazaina izanagatik ere, honek ez du zerbitzurik eskaintzen. Zerainen, aldiz, 2020 urtean kendu zuten herriko kutxazaina.
Joera bera Hego Euskal Herri osoan
Goierriko egoera ikusi dugu, baina joera bera da Hego Euskal Herri osoan: banketxeetako bulegoak gutxitzen doaz, digitalizazioaren aldeko apustua indartzearekin batera. Azpiko taulan kontsultatu daiteke bilakaera herriz herri.
