Azken orduetako euri jasak hasi dira eragina izaten gurean. Izan ere, azken 48 orduetan 91 l/m² jaso dira Estandako estazio metereologikoan.
N-I errepidean luizi bat izan da Madrilgo norantzako 407. km-an, Idiazabalen. Errepidea itxita egon ondotik errei bat ireki dute goizeko 8:00etan.
Zegamako Udalak jakinarazi duenez luizi batek Otzaurteko bidea itxiarazi du.
Bestetik, Oria ibaiak gainezka egin du ohiko puntuetan. Batetik, Ordiziako Tximista pasabidean. Ondorioz, Mallutz industrialdetik erdigunera doan bidea itxita dago.
Beasainen ere, ura bere bidetik irten da Igartza Monumentu Multzoan, Burdinola eta errota hartuz.
Gainera, Beasaingo Udalak Ezkiaga etorbidean dauden garajeetatik ibilgailuak ateratzea gomendatu du. Gauean zehar uneren batean gainezka egin du Oriak baina goizean bere bidera itzulita dago.
Ataungo Udalak adieraz duenez, Agauntza errekak ere gainezka egin du zenbait lekutan. Kaxio bidean ez ibiltzeko eskatu dute, eta erreka ertzera ez hurbiltzeko.
Abisu laranja
Gipuzkoa barnealdea abisu laranjan dago astearteko eguerdiko 12:00ak arte. 24 orduan 80 l/m² baino gehiago pila daitezke. Gainera, Euskalmeten arabera, kantitate handienak isurialdeen arteko banalerroan metatuko dira. Aizkorri, Aralar eta Etzegaraten kokatzen da banalerroa.