Gipuzkoako Foru Aldundiak, Zaldibian, GI-2133 eta GI-3371 errepideen arteko elkargunea hobetuko du, Ordiziara doan errepidetik Gaintzara igotzeko bidegurutzean, hain zuzen ere. Segurtasuna handitzeko lanak izango dira eta, jarduketari esker, bidea zabaldu eta itxaroteko errei bat egingo da. Lanak dagoeneko 103.770 eurotan esleitu dira eta 4 asteko epea izango dute.
Lanen berri emateko, Maria Ubarretxena, Bide Azpiegituretako diputatua, Zaldibiako alkate Ioritz Berrarekin eta Gaintzako alkate Jon Gorrotxategirekin elkartu da.
Gaur egun, “T” formako bidegurutze bat dago elkargune honetan, erdian itxarote-erreirik gabea. Ondorioz, Ordizia aldetik Gaintzara biratu nahi duten ibilgailuek errepide erdian geratu beharra daukate paretik ibilgailuak datozenean, eta honen ondorioz arrisku egoerak sor daitezke. Aldi berean Gaintzatik (GI-3371) Zaldibia alderako biraketa egiteko 2 noranzkoak zaindu beharra daude. Obrek ekarriko duten antolaketa berrian, Ordiziako bidetik Gaintzara jotzeko biraketa errei bat egongo da eta Gaintzatik Zaldibia aldera, berriz, itxarote-errei bat. Hala, bidegurutzea berrantolatzeko lehendik dagoen galtzada handituko da, eta zoru-pakete berri bat jarriko da.