Igandean ospatuko diren Foru eta Udal hauteskundeen emaitzak Goierri Telebistan eta gitb.eus webgunean jarraitu ahalko dira, datuak eguneratzen joan ahala.
Gainera, emaitzak jakin bezain laster, hiru herri handienetako (Beasain, Ordizia eta Lazkao) protagonista nagusienen balorazioak ere jasoko ditugu.
Igandea iritsi bitartean, 1977tik gaur egun arte ospatu diren hauteskundeetako emaitzak kontsultatu daitezke hauteskundeei eskainitako atari berezian.
Udalak herritarrengandik gertuen dauden erakundeak izanda, Goierri Telebistan ahalegin berezia egiten ari gara goierritarrei hurbileko informazioa eskaintzeko. Hala, kanpainan zehar Goierriko herrietan ordezkaritza duten alderdietako hautagaiei bakarkako elkarrizketak egin dizkiegu, alderdien ekitaldien berri emateaz gain. Foru hauteskundeei dagokienez, Diputatu Nagusi izateko bost hautagaien elkarrizketak ere eskaini ditugu.
Hauteskunde gauean ere, esfortzu berezia egingo dugu hauteskundeek Goierrin uzten dituzten emaitzak goierritarrei gerturatzeko.