Gabiriako Udalak eta herriko hainbat eragilek ohar bateratua plazaratu dute sare sozialetan, 2026ko festen inguruko balorazioa egiteko. Bertan, herritarren parte-hartzea eta jai giro bikaina azpimarratzearekin batera, festetan zehar izandako hainbat gertakari larri publikoki salatu dituzte.
Oharrean adierazten denez, eguraldia lagun, festak "bikainak eta jendetsuak" izan badira ere, "lehen egunetik azkenekora arte herritar guztion ahotan ibili diren zenbait gertakari" salatu behar izan dituzte. Besteak beste, seinaleetan egindako pintaketak, umeei zein kontzertuetako soinu-teknikariei petardoak eta zigarroak botatzea, txosnako langileei oztopoak jartzea, edariak ordaindu gabe alde egitea eta musikarien kontra edalontziak zein izotzak jaurtitzea aipatu dituzte. Gertakari horien ondorioz, abuztuaren 14ko kontzertuak behin baino gehiagotan eten behar izan ziren, azken emanaldia garaia baino lehen amaitu zen eta txosna zein ostatua lehenago itxi behar izan zituzten.
Udalak eta herriko elkarteek argi utzi nahi izan dute ez dela kasu isolatua edo adingabeen kontua: "Ez da umeen kontua; 18-25 urteko gazteak dira. Ez dugu ulertzen nola diren gai ondoko herrira etorri eta festak horrela boikoteatzeko, egunez egun." Gainera, nabarmendu dute arazoak lagun talde berberak sortu dituela berriro ere, baina aurten "muga guztiak pasatu" dituztela.
Horren aurrean, mezu garbia eta sendoa helarazi nahi izan diete jarrera hori izan dutenei: "Ez gaude prest guk hainbeste mimoz antolatzen ditugun festak haien erruz izorratzeko. Errespetuzko festak nahi genituela genioen festa aurreko deialdietan, baina zenbaitek ez dute inolako errespeturik erakutsi gure festekiko. Beraz, jakin horrelako portaera duena ez dela ongietorria gurean."
Azkenik, "Ez dugu festa herrikoien aurkako erasorik onartuko! Festak denonak dira, elkar errespetatuz libre gozatzeko!" aldarrikapenarekin amaitu dute oharra, herritar zein antolakuntza lanetan ibili direnei eskerrak emanez eta aurrerantzean ere jai errespetuzko eta herrikoien alde lanean jarraituko dutela berretsiz.
Adierazpena Gabiriako Udalak, Osinalde Elkarteak, Erbie Elkarteak, Agirin Elkarteak eta Gabiriko Gaztek sinatu dute.