Urte hasierarekin batera iragarri zuen Osinalde Sariko antolakuntzak aurtengo sariketaren datak eta orain, bertan parte hartuko duten bertsolarien izenen berri eman dute.
Martxoan zehar jokatuko dira finalerako baliagarriak diren Osinberde, Aztiria eta Argi Berri sariak eta kanporaketa bakoitzean seina bertsolari arituko dira.
Martxoaren 9an jokatuko da lehen kanporaketa Zaldibian. Osinberde sarian Aner Peritz, Maddi Aiestaran beasaindarra, Josu Ibarguren, Janire Arrizabalaga , Ekain Alegre eta Maite Sarasola arituko dira.
Aztiriko saria martxoaren 16an ospatuko da eta bertan kantari Aitor Tatiegi, Ekhiñe Zapian, Eki Manteorena, Iruri Altzerreka, Naia Arrizabalaga eta Mikel Etxezarreta olaberritarra arituko dira.
Azken kanporaketa Ordizian ospatuko da martxoaren 23an. Hauek dira Argi Berri elkartean kantatuko duten bertsolariak: Aroa Arrizubieta, Haizea Arana, Aitor Ugarte, Bittor Altube, Maide Garmendia zaldibiarra eta Irantzu Idoate.
18 bertsolariak 19 eta 24 urte bitartekoak dira eta bederatzirentzat lehen aldia izango da sariketa honetan. Errepikatzen dutenen artean, Aner Peritz da iazko finalera iritsi zen bakarra.
Hiru goierritar arituko dira aurten . Maddi Aiestaran beasaindarra iaz bezalaxe Zaldibian arituko da. Maide Garmendia zaldibiarrak, 2022an parte hartu zuen Argi Berri sarian eta aurtengo edizioan ere Ordizian kantatuko du. Azkenik, Mikel Etxezarreta olaberritarrak lehen aldiz parte hartuko du eta Aztiria Bat elkarteko saioa egokitu zaio.
18 bertsolari hauen artean egongo da aurtengo Osinalde Sariaren irabazlea. Finala apirilaren 6an izango da Gabirian eta kanporaketa bakoitzetik bina bertsolari sailkatuko dira.
Urtero bezala, GOIERRI TELEBISTAn hiru kanporaketa saioak eta finala osorik eskainiko dira.