Igandean, arratsaldeko 19:30tan ospatuko da makilaren jaitsiera eta jarraian Bergarako zezenak aterako dira gazteen gozamenerako. Ondoren, afaria izango dute eta Elektrotxorongo elektrotxarangak girotuko du gaua.
Hurrengo egunean, herri kirolak ospatuko dira eguardi partean eta arratsaldean umeentzako apar-festa egingo dute. Bertsoak ez dira faltako Gabirian. Arratsaldeko 18:30etan emango zaio hasiera bertso-saioari Oihana Arana, Miren Artetxe, Amest Arzallus, Mikel Etxezarreta, Joanes Illarregi eta Aitor Sarriegi bertsolariekin. Gauean berriz, 23etan, kontzertuak hasiko dira. Silita, Willis Drumond eta DJ Expuela izango dira plazan.
Abuztuaren 15ean izango da egun handia. Meza Nagusiaren ostean, txirrindulari igoera egingo dute eta arratsaldean, umeentzako puzgarriak eta jolasak antolatu dituzte. Xabin Fernandez legorretarraren Kanpora Sartzen antzezlana ere izango da asteartean, arratsaldeko 18retan. Gainera, festetako egun handia mozorroturik ospatuko dute gabiriarrek.
Abuztuaren 16ean, Goruntz dantza taldeak emanaldia eskainiko du mezaren ondoren eta arratsaldean, sagardo dastaketarekin batera, bola eta toka txapelketa ospatuko dute. Gauean berriz, giro aparta espero da Bengo eta Dupla musika taldeekin.
Ostegunean, bola, toka eta tiragoma txapelketa ospatuko dute herritarrek eta iluntzean ardo banaketa eta afari-merienda egingo dute Joselu Anayak girotuta.
Abuztuaren 18an amaituko dira festak. Herria txukundu ondoren, afari-merienda egingo dute Osinalde elkartean.