Igartza Musika zikloaren egitarauaren barruan, FEMMM ahots-laborategiak kontzertua eskainiko du igandean, azaroaren 8an, Beasaingo Igartzako jauregian. Emanaldia arratsaldeko 19:00etan hasiko da.
Euskal jazzaren eszenako proposamen berritzaileenetako bat da FEMMM. Musikenen hezitako lau emakume gaztek osatzen dute taldea: Nahia Valle, Maider Biguri, Dánae Riaño eta Alazne López. Ahots-laborategi gisa sortu zuten proiektua, ahotsaren harmoniak, sonoritateak eta koloreak ikertzeko asmoz.
Polifoniaren aberastasuna ardatz hartuta, jazz klasikoaren tradizioa eta pop garaikidearen freskotasuna uztartzen dituzte. Beasainen, laguntza-bandarekin arituko dira: Daniel López pianoan, Cristina Pascual baxuan eta Iker Hernández baterian.
2024ko martxoan jendaurreko debuta egin zutenetik, taldeak oihartzun zabala lortu du. Igartzako jauregiko aretoan eskainiko duten emanaldiak giro akustiko intimoa eta erritmo biziko uneak uztartuko ditu, zuzeneko dotore eta aldarrikatzaile batean.