Beasaingo lau ikastetxetako 448 ikaslek parte hartu dute «Gizaki Bitxidunak» hezkuntza-ekimenean. Beasaingo Udalak eta Dar-Dar Gizarte Ekimen Kooperatibak elkarlanean antolatutako egitasmo honen bidez, giza eskubideak, nahi ez den bakardadea eta ongizate emozionala landu dituzte, antzerkia eta elkarrizketa ardatz hartuta. Guztira, ordu eta erdiko 23 saio egin dituzte Andramendi Ikastolan, La Salle ikastetxean, Murumendi eskolan eta Alkartasuna Lizeoan. Antzezlanak ikasleen artean hausnarketa pizteko balio izan du.
Landutako pertsonaien istorioen bidez, haur eta gazteek hainbat gai jorratu dituzte; besteak beste, identitatea, ezberdintasuna, bakardadea, bazterketa eta errespetua. Antzezlanaren ondoren, aktore eta dinamizatzaileek elkarrizketa irekiak gidatu dituzte, ikasleek beren emozioez eta talde-lankidetzaz hitz egin dezaten. Era berean, bakarrik egotearen eta bakarrik sentitzearen arteko aldeaz, taldean integratzeko beharrezko baldintzez eta baztertuta daudenei laguntzeko moduez hausnartu dute.
Ikasleen iritziak, etorkizuneko ekintzen oinarri
Ekimenaren helburu nagusietako bat ikasleen ahotsari lekua egitea izan da. Horregatik, saioetan jasotako iritzi zein proposamenak aztertu ondoren, ondorio nagusiak bilduko dituen amaierako txostena prestatuko dute antolatzaileek. Dokumentu hori parte hartu duten ikastetxeei eta Beasaingo Udalari helaraziko diete, haur eta gazteen ikuspegia etorkizuneko prebentzio, sentsibilizazio eta hezkuntza-ekintzetan kontuan har dezaten.
Antolatzaileen lehen balorazioak oso positiboak izan dira; izan ere, saioetan sortutako elkarrizketen aberastasuna azpimarratu dute. Ekimen honek mezu argia zabaldu nahi izan du: talde bateko kide izateko ez dela beharrezkoa denak berdinak izatea, eta pertsona guztiek dutela duintasunez tratatuak zein entzunak izateko eskubidea.
Goierriko beste sei herritara zabalduko da
«Gizaki Bitxidunak» ekimena Nahi Ez Den Bakardadea eta Buru Osasuna proiektuaren barruan kokatzen da. Programa 2023an abiatu zen Beasainen, eta 2024an izan zuen jarraipena, adin guztietako herritarrengana iristeko helburuarekin.
2026an, Beasainen egindako lana sendotzeaz gain, proiektua Goierriko beste sei herritara zabaltzea aurreikusi dute. Modu horretan, bakardadearen prebentzioa eta ongizate emozionala sustatzeko lana eskualde osora hedatuko dute.