Diagnostiko berriaren helburua, herriko haur eta nerabeen bizi-kalitatea, beharrak eta sozializazio-ohiturak aztertzea izan da, Udalaren etorkizuneko Ekintza Plan berria diseinatu eta esku-hartze publikoak bideratzeko.
Otsailetik ekainera egindako ikerketan datu ofizialak aztertu dituzte, 11 eta 16 urte arteko 334 neraberen galdetegiak jaso dituzte eta udaleko, hezkuntzako eta aisialdiko eragileekin lan-saioak egin dituzte.
Ondorio nagusien artean, ongizate emozionala, euskararen erabilera, aisialdia eta parte-hartzea nabarmendu dituzte. Nerabeen %77,84k familian bilatzen du laguntza nagusia, baina frustrazioaren kudeaketan eta sare sozialen erabileran zailtasunak antzeman dituzte.
Aisialdian parte-hartzea handia da, %92,51koa, baina 10 eta 15 urte arteko gazteentzako eskaintzan hutsuneak daudela jaso dute. Gainera, nerabeen erdiek Gaztelekuaren beharra ikusten dute topagune gisa.
Euskarari dagokionez, %71,56k euskaraz aritzea gustuko du, baina gaztelaniaren erabilera handiagoa da lagunartean eta ingurune digitalean. Parte-hartzearen alorrean ere erronkak dituzte, gazteen iritzia udal erabakietan gehiago txertatzea helburu.
Diagnostikoaren ondorioak etorkizuneko Ekintza Plana diseinatzeko abiapuntu izango dira. Gazteleku berria, berriz, ondorio horiei erantzuteko lehen urratsetako bat izango da eta laster irekiko dute.