Abuztuaren 12an izango den eguzki-eklipse historikoa aitzakia hartuta, Beasaingo Udalak eta Bareak Elkarteak tokiko merkataritza sustatzeko kanpaina berezia jarri dute martxan. Uztailaren 29tik aurrera, ekimenean parte hartzen duten saltokietan erosketak egiten dituzten lehen bezeroek eklipsea segurtasunez ikusteko homologatutako betaurrekoak jasoko dituzte doan.
Udalaren esanetan, ekimenaren helburua da "tokiko merkataritza sustatu, bultzatu eta indartzea", baita herriko establezimenduetara bezero berriak erakartzea eta ohiko erosleak fidelizatzea ere. Horren harira, nabarmendu du "merkataritza txikia ez dela soilik ekonomiaren eragile bat; herri bati bizia, segurtasuna, gertutasuna eta nortasuna ematen dion oinarrizko zutabea" dela.
Kanpainaren beste ezaugarri aipagarrienetako bat da betaurrekoak Beasaingo bost optikaren eta optometrista baten bidez eskuratu direla. Udalak azaldu du horrela "herriko sektore honetako profesionalei keinu zuzena" egin nahi izan diela, banatuko den materialaren "kalitatea eta berme teknikoa erabat ziurtatuz".
Izan ere, eguzki-eklipse bat ikusteko ezinbestekoa da homologatutako babes-sistemak erabiltzea. Udalak gogorarazi du ISO 12312-2 araua betetzen duten betaurrekoak baino ez direla seguruak, eta ohartarazi du ohiko eguzki-betaurrekoek edo etxean prestatutako iragazkiek "ez dutela begi-osasuna babesten". Horregatik, banatuko diren betaurreko guztiek segurtasun-baldintza guztiak betetzen dituzte.
Betaurrekoak uztailaren 29tik aurrera banatuko dira, kanpainarekin bat egin duten herriko saltoki eta zerbitzuetan erosketak egiten dituzten lehen bezeroen artean. Guztira, hainbat sektoretako dozenaka establezimenduk parte hartuko dute ekimenean, unitateak agortu arte.
Amaitzeko, Beasaingo Udalak eta Bareak Elkarteak herritarrak eta bisitariak tokiko saltokietan erostera gonbidatu dituzte, "herria bizirik mantentzeko" eta, aldi berean, "abuztuaren 12ko gertaera astronomiko paregabe honetaz modu seguruan gozatzeko".