Ane Etxezarretak futbol profesionalari agur esan dio. Jokalari beasaindarrak duela egun gutxi argitaratu zuen bere sare sozialetan erabakiaren berri emateko bideoa. Bertan, bere kirol-ibilbideari errepasoa egin eta bidean lagun izan dituen guztiei eskerrak eman zizkien. Bideoaren bidez, etapa bati amaiera eman eta beste bati hasiera emateko unea dela adierazi zuen: "Etapa hau itxi, datozenei bidea zabalik utzi eta berri bat hasteko garaia da."
Duela aste batzuk, SD Eibarrek jakinarazi zuen Ane Etxezarretak ez zuela taldean jarraituko datorren denboraldian. Klubak eskerrak eman zizkion denboraldi osoan erakutsitako profesionaltasunagatik eta etorkizunerako zorterik onena opa zion, bai maila pertsonalean bai kirol arloan. Etxezarreta 2025eko udan iritsi zen Eibarrera, Realetik etorrita. Hasieran 2027ra arteko kontratua sinatu bazuen ere, bi aldeek aurtengo udan euren arteko lotura amaitzea adostu zuten.
Bere ibilbiderik luzeena, ordea, Realean egin zuen. 2015ean iritsi zen Donostiako taldera, eta hamar denboraldiz defendatu zituen kolore txuri-urdinak. Denbora horretan, 2019ko Espainiako Kopa irabazi zuen Realarekin, klubaren historiako lorpenik garrantzitsuenetako baten parte izanik.
Horrela, Ane Etxezarretak amaiera eman dio hamarkada bat baino gehiagoko futbol profesionaleko ibilbideari.