Gidabaimena euskaraz ateratzea sustatzeko bi ziklomotor elektriko zozkatuko dira Beasaien

Beasaingo Udalak urrats berri bat eman du euskararen erabilera sustatzeko politikan, gidabaimena euskaraz ateratzen duten herritarrentzako pizgarriak handituz. Orain arte indarrean egon den 150 euro arteko dirulaguntzari, "Gidabaimenak Euskaraz" egitasmoaren baitan bi ziklomotor elektrikoen zozketa gehitu zaio.
Ekimenaren helburua gero eta herritar gehiagok gidabaimena lortzeko prestakuntza eta azterketa teorikoa euskaraz egitea aukeratzea da. Udalaren esanetan, neurri honek euskararen erabilera indartzen lagunduko du eguneroko bizitzako esparru batean, aldi berean herritarrei aukera erakargarriak eskainiz.
Gaur egun, Beasaingo hiru autoeskoletan gidabaimena euskaraz prestatu eta azterketa gainditzen duten ikasleek gehienez 150 euroko dirulaguntza jasotzeko aukera dute. Laguntza horren inguruko informazio guztia udalaren webgunean kontsulta daiteke.
Horrez gain, 2026an zehar gidabaimenaren prestakuntza eta azterketa teorikoa euskaraz egiten dutenek bi ziklomotor elektrikoen zozketan parte hartu ahal izango dute. Zozketan sartzeko, interesdunek 15 urtetik gorakoak izan beharko dute, eta 2026ko urtarrilaren 1etik abenduaren 3ra bitartean parte hartu.
Udalak gogorarazi du herriko autoeskoletan euskaraz ikasteko material eta baliabide eguneratuak daudela, eta herritarrak animatu ditu aukera baliatzera eta egitasmoan izena ematera. Neurri berriaren bidez, euskararen erabilera sustatzeaz gain, gazteen artean mugikortasun jasangarria ere bultzatu nahi da.