Uda garaia bertan dugu eta Beasainen beroari aurre egiteko azpiegiturak prest daude jada. Horrela, Dolarea parkeko ur jolasak martxan jarriko dira gaur eta urrira arte egongo dira erabilgarri, betiere eguraldiaren arabera. 09:00etatik 21:00etara bitartean egongo dira martxan eta Udalak adierazi duenez “ingurumenarekiko duten konpromiso sendoa beteko du azpiegitura honek”. Izan ere, uraren kontsumo arduratsua bermatzen du azpiegiturak: jokoak zirkuitu itxi batean dabiltza; ura berrerabili eta iragazi egiten da, milaka litro alferrik galtzea ekidinez. Gainera, hornidura zabalik egon arren, jolasak eskuz aktibatu behar dira martxan jartzeko.
Bestetik, Osasun eta segurtasun bermea ere badu. Egunean bi analisi egiten dira eta hilean behin laborategiko azterketa berezia egiten da.
Antzizarreko kanpoko igerilekuak
Antzizar Kiroldegiko kanpoko igerilekuak ekainaren 15etik irailaren 15era egongo dira zabalik , eguraldiak laguntzen duen egun guztietan. Ohiko zerbitzu guztiak egongo dira prest: taberna, itzalkiak, dutxak eta aldagelak. Nahi duten herritarrentzat udako abonua ateratzeko aukera zabalik dago dagoeneko. Astelehenetik ostiralera 11:30etik 20:30era egongo da zabalik eta asteburuetan eta abuztuan 20:00etan itxiko da.
Bibliopiszina zerbitzua
Igerilekuekin batera, liburu eta aldizkarien mailegu zerbitzua ere abian jarriko da. Egunero egongo da zabalik 11:30etik 20:00etara, eta materiala 19:45erako itzuli beharko da etxolara.