Racing Santander futbol taldeak Espainiako Futbol Ligako Lehen Mailara igotzeko txartela eskuratu zuen asteburuan, eta lorpen historiko horretan protagonista izan da Aritz Aldasoro.
Beasainen jaiotako erdilaria 2022-2023 denboraldian iritsi zen Santanderreko taldera, Real Sociedad B taldean hainbat urte eman ondoren. 2018tik 2022ra bitartean Sansen aritu zen, eta talde txuri-urdinarekin Bigarren Mailarako igoera lortu zuen.
Denboraldi amaieran, Realak jarraitzeko eskaintza egin arren, Racingera joatea erabaki zuen, talde kantabriarra Bigarren Mailara igo berritan. Taldeak mailari eustea lortu zuen lehen denboraldian, eta Aldasororen jardun onak klubaren konfiantza ekarri zuen; horren ondorioz, beste hiru denboraldirako berritu zuen kontratua.
Orain, asteburuan lortutako igoerarekin, Aldasorok lehen aldiz jokatuko du Espainiako futbolaren maila gorenean.
Igoeraren ostean, futbolari beasaindarrak sare sozialetan ere partekatu du bizi duen emozioa. “Ahaztezina” izan dela adierazi du, oraindik ere lortutakoa guztiz sinetsi ezinda dagoela aitortuz. Gainera, igoera eskualde oso baten ametsa izan dela nabarmendu du, Racingen inguruan sortu den familia xume, langile eta sutsua goraipatuz. Halaber, eskerrak eman dizkie taldekideei, teknikariei, klubari eta, bereziki, zaleei, inoiz bultzatzeari utzi ez diotelako. Azkenik, Racing taldea “merezi duen tokira” itzuli dela azpimarratu du.