CAFeko Beasain eta Irungo lantegietako langileen batzarrek enpresako Zuzendaritzak egindako seigarren proposamena berretsi dute. Ondorioz, azken hiru asteetan martxan egon diren lanuzteak eta mobilizazioak bertan behera geldituko dira.
Hiru urteko indarraldia du akordio berriak. Besteak beste, Beasaingo tailerretan gutxienez 190 pertsona kontratauko dira, Irungo tailerretan gutxienez 40 pertsona ta 11 gehiago bulego lanetarako Beasainen. Errelebo-kontratuaren aplikazioa ere bermatzen da. Bertan lan postuak sortzearekin lana kanporatzea ekidin nahi dute.
Soldata-igoerak KPIaren gainetik izango dira eta, hitzarmenaren indarraldian zehar, 1.592,5 orduko lanaldia enpresako kolektibo guztiei aplikatuko zaie. Era berean, lehen aldiz, urteko lanaldia 35 orduko asteko lanaldia baino txikiagoa izango da kolektibo batean (4. erreleboko langileentzat 1.584,5 ordu), eta horrek atea irekitzen dio etorkizunean gainerako langileentzat ere lanaldi-murrizketak lortzeari.
Aintzinatasunari dagokionez, enpresan emandako zerbitzu-denbora osoa zenbatuko da. Gainera, lizentzien hobekuntzak jasotzen dira, batez ere heriotza eta ospitaleratze kasuetan, baita kontsulta medikoetan egindako aurrerapenak ere.
Joan-etorrietan, dietetan eta bidaia-baldintzetan ere hobekuntzak jaso dira, CAFeko langile guztientzako dietak parekatzea barne.
Beasaingo lantokian parte hartu duten langileen %64ak eman dio babesa hitzarmenari. Irunen, aldiz, %73koa izan da babesa.
Bai LAB zein ELA sindikatuek lanuzteek eta mobilizazioek hitzaremaren negoziaketan izandako pisua azpimarratu dute.