Ostiralean hasiko diren Beasaingo Loinatz Jaien hasierarekin batera ospatuko dute Realak lortutako Errege Kopako garaipena. 2019an Ane Etxezarretari egindako harreraren ondoren, udalak bi jokalari txuri-urdin beasaindarren lorpena aitortu nahi du herrikideen aurrean.
EKITALDIA
- 17:15 – Iritsiera eta pasabidea: Aritz eta Beñat Loinazko San Martin plazara iritsiko dira koparekin. Bertan, Beasain KE-ko gaztetxoen taldeetako jokalariek pasabidea egingo diete udaletxeko sarreraraino.
- 17:30 – Ekitaldi instituzionala: Udaletxeko batzar areto nagusian, Leire Artola alkateak harrera egingo die jokalariei. Ekitaldi honetan jaietako zapiak jantziko dizkiete eta ekitaldi hau gogoraraziko duen oroigarria emango zaie.
- 17:45 – Kopa eskaintzea: Protagonistak udaletxeko balkoi nagusira aterako dira kopa beasaindarrei eskaintzera.
Festei hasiera emateko, La Salle ikastetxeko ikasleek botako dute txupinazoa 18:00etan eta erraldoi eta buruhandiekin batera, kaleak alaitzen hasiko dituzte herritarrek.