ELA sindikatuak ohar bidez jakinarazi duenez, CAF Beasaingo, Irungo eta Madrilgo enpresa batzordeek aurreakordio bat lortu dute CAFeko zuzendaritzarekin hitzarmen kolektiboa berritzeko.
Aurreakordioak hiru urteko indarraldia izango luke eta Beasain, Irun eta Madrilgo zentroetan aplikatuko litzateke.
Sindikatuaren arabera, aurreakordioak “aurrerapen handiak jasotzen ditu hainbat arlotan”. Soldatari dagokionez, 2026an %3,15eko soldata igoera, EAEko KPIa + %0,50 2027an eta EAEko KPIa + %0,75 2028an, hitzarmenaren indarraldi osoan KPIaren gaineko igoerak bermatuko lirateke.
Enpleguari dagokionez, 190 kontratazio finko aurreikusten ditu obreroen kolektiboan, 150 Beasainen eta 40 Irunen. Gainera, 11 kontratazio finko jasotzen dira enplegatuen kolektiboan.
Aurreakordioaren arabera, Beasaingo eta Irungo tituludunen lanaldia gainerako langileenarekin parekatuko da “1.592,5 ordukoa izango baita urtean. Horrez gain, laugarren erreleborako 8 orduko murrizketa egingo da urtean, eta lanaldia 1.584,5 ordukoa izango da 2027 eta 2028rako”.
Halaber, antzinatasunean egindako aurrerapenak ere jasotzen ditu dokumentuak: lizentzietan egindako hobekuntzak, hala nola gurasoen edo anai-arreben heriotzagatik 2 eta 3 egun baliodun igarotzea; mediku kontsultetan egindako hobekuntza; nazioarteko joan-etorrietan egindako aurrerapenak, borondatezkoak ez diren bidaietan egindako bi hilabete jarraitura mugatuz; eta CAFeko langile guztientzako dieten parekatzea.
1965ean, 1966an eta 1967an jaiotako pertsonentzako errelebo-kontratuaren aplikazioa ere mantenduko litzateke.
ELAk “positibotzat” jotzen du aurreakordioa, negoziazioan eskatzen zituzten aldarrikapen garrantzitsuak jastzen direlako.
Maiatzaren 13ko ELAko afiliatuen asanbladan berretsi beharko da aurreakordioa, “ELAren bermea izateko”, eta ondoren Beasain, Irun eta Madrilgo langile guztiek bozkatuko dute maiatzaren 14an.
ELAk eta LABek osatzen dute CAFeko gehiengo sindikala. LABek adierazi duenez, afiliatuekin kontsultatu eta aurreakordioak beraien oniritzia izan arte, ez dute hone inguruko adierazpenik emango.