ELA eta LAB sindikatuek martxoan iragarritako lanuzteetako lehena burutu da gaur CAFeko Beasaingo enpresan. Hitzarmenaren negoziazioaren esparruan onartutako mobilizazioak dira eta guztira 67 orduko geldialdia aurreikusten du egutegi horrek, apirila eta ekaina bitartean banatuta. Gaur ekin diote lanuzteen egutegiari, bi orduko lanuztearekin.
ELAk ohar bidez jakitera eman duenez, “langileen gehiengo zabal batek bat egin du deialdiarekin, eta argi utzi du dagoen ezinegona eta zuzendaritzaren proposamen serio baten faltaren aurrean erantzuteko borondatea.”
LAB sindikatuak mobilizazioen berri eman zuenean, hitzarmenaren negoziazioa blokeatuta zegoela adierazi zuen, ELAk berriz, “negoziazioa ez dagoela blokeatuta" dio baina salatu du "enpresak edukirik gabe eta aurrera egiteko benetako borondaterik gabe jarraitzen duela.” Enpresak benetako soladata-igoerarik ez duela bermatzen gaineratu du.
Egora honen aurrean, “langileek mobilizazioak hasi dituzte, zuzendaritza jarrera hori uztera eta negoziazio mahaira proposamen serio bat ekartzera behartzeko”.