Udalak eta Hezten elkarteak bosgarren urtez elkarlanean antolatu duten ekimen honen xede Nagusia, familien hizkuntza ohituretan eragitea eta aisialdian euskararen erabilera indartzea da.
Aurten ere, Beasaingo Udalak eta Hezten elkarteak martxan jarriko dute Parketarrak egitasmoa, kale eta parkeetan euskararen presentzia handitzeko asmoz. Bosgarren edizioa izango da aurtengoa, eta udaberriko saioak apirilaren 15ean, 22an eta 29an, eta maiatzaren 6an egingo dira.
Egitasmo hau udaberrian eta udazkenean gauzatzen da, eta helburu nagusia aisialdiko gune publikoetan euskaraz aritzeko aukerak sortzea da. Parkeak familia eta haurrentzako elkargune bihurtu nahi dira, jolasa eta hizkuntza uztartuz.
Parketarrak egitasmoaren ardatza da familien eta haurren hizkuntza ohituretan eragitea, euskararen erabilera modu naturalean bultzatuz aisialdian. Parkeetan euskarazko jolasak eskainiz eta familien parte-hartzea sustatuz, eguneroko harremanetan hizkuntza ohiturak indartzea lortu nahi da. Eskolaz kanpoko eremuetan euskaraz aritzeko aukerak zabaltzea ezinbestekoa da, eta egitasmoak horretarako espazio informala eskaintzen du. Jolasaren bidez, harremanak sendotu, ondo pasatu eta euskarazko jolasen transmisioa sustatzen da, hizkuntza modu atsegin eta naturalean txertatuz.
Saioak bi multzotan antolatzen dira, adinaren arabera egokituta, eta Hezten elkarteko dinamizatzaileek gidatzen dituzte, giro parte-hartzailea bermatuz:
Zabu Zibu (16:45–17:45): 3 eta 5 urte bitarteko haurrak dituzten familiei zuzenduta dago. Adin honetan helduen presentzia eta inplikazioa ezinbestekoa da; haurrek guraso edo heldu batekin batera parte hartzen dute, familian bertan hizkuntzaren transmisioa eta erabilera sustatuz.
Txirrintxon (17:45–18:45): 6 eta 9 urte bitarteko haurrei zuzendutako jolas aktiboak izango dira. Haurrak autonomia handiagoz aritzen dira, baina taldean eta euskarazko interakzioak bultzatuz.
Azken urteetan egitasmoak harrera oso ona izan du. 2025ean, udaberriko eta udazkeneko saioetan 187 haurrek eta 34 helduk hartu zuten parte, ekimenaren arrakasta eta herritarren interesa agerian utziz.
Beasaingo Udalak herriko familia guztiak animatu nahi ditu Parketarrak egitasmoan parte hartzera, parkeak euskarazko aisialdiaren gune bizien bihurtzen jarrai dezaten. Aukera paregabea da familian gozatzeko, harremanak sendotzeko eta euskaraz bizitzeko.