Beasaingo Udalak, Berdintasun Sailaren bitartez eta Berdintasun Kontseiluarekin lankidetzan, herriko emakumeentzako Jabetze Eskolaren lehen edizioa aurkeztu du. Egitasmo honen helburu nagusia emakumeen arteko sareak sortzea eta genero-berdintasuna sustatzeko espazio seguru eta inklusibo bat eskaintzea da.
Hausnarketa eta jabetzea helburu
Jabetze Eskola adin, jatorri eta nortasun anitzeko emakumeen errealitatea ikuspegi feminista eta intersekzionaletik aztertzeko gunea izango da. Eskaintzaren bidez, parte-hartzaileek bizi duten diskriminazioaz kontziente izateko eta beren bizitza pertsonal zein sozialean aktiboki parte hartzeko gaitasuna indartzeko aukera izango dute.
Programak prestakuntza-ikastaroak, hausnarketarako guneak eta aisialdiko jarduerak biltzen ditu, gai anitzak landuz: autodefentsa, elikadura, kultura eta eskubideak, besteak beste.
12 jarduerako egitarau zabala
Otsailetik ekainera bitartean, mota askotako 12 ekintza antolatu dira:
- Wikiemakumeok Edukiak genero ikuspegitik Wikipedian editatzen ikasteko tailerra. Aittu Elkarteak gidatuta, Aranealden izango da otsailaren 2tik apirilaren 30era bitartean. Saioak astelehenetan (17:00-18:30) edo asteazkenetan (10:00-11:30) egingo dira.
- Elikadura menopausian Amaia Ayerbek zuzendutako ikastaro honetan, menopausia garaian elikadura-estrategia onak kudeatzen ikasiko da. Urbietan izango da otsailaren 6, 13, 20 eta 27an (ostiralak), 17:30etik 19:30era.
- Autodefentsa feminista Lahia 3.0 taldeak indarkeria matxistei aurre egiteko estrategiak landuko ditu. Udaletxeko sarrerako gelan izango da otsailaren 9an eta 23an (astelehenak), 17:00etatik 19:00etara.
- Envejecer bonito (gazteleraz) Kontxi Lopezek gidatutako tailer honek adinkeriaz eta zahartzeari buruzko aurreiritziak ditu ardatz. Otsailaren 11n, asteazkena, izango da Udaletxeko Osoko Bilkuren Aretoan, 17:00etatik 18:30era.
- Guraso eskola feminista Hezkidetza, gurasotasuna, matxismoa eta sexualitatea bezalako gaiak jorratuko dira Lahia 3.0ren eskutik. Udaletxeko sarrerako gelan martxoaren 9an eta 23an, eta apirilaren 13an eta 27an (astelehenak), 17:00etatik 18:30era.
- Luces en sombra – documental y coloquio (gazteleraz) Zaintzaile migratzaileen errealitatea aztertuko da Bidez Bideren eskutik. Martxoaren 17an, asteartea, Udaletxeko sarrerako gelan, 16:30etik 18:00etara.
- Kotxearen mantentze lanak Olatz Egigurenek autoaren oinarrizko zainketak modu praktikoan irakatsiko ditu. Martxoaren 28an, larunbata, Erauskin kaleko 19an (Eula zegoen lekuan), 9:30etik 13:30era.
- Irakurle eskola feminista Iratxe Retolazarekin pentsamendu kritiko-feminista sustatzeko gunea. Saioak apirilaren 22an, maiatzaren 20an eta ekainaren 3an izango dira (asteazkenak), Oriamendi 18 behean.
- Homologación de estudios extranjeros (gazteleraz) Atzerriko ikasketak onartzeko prozesuari buruzko informazio-hitzaldia Bidez Bideren eskutik. Apirilaren 23an, osteguna, Udaletxeko sarrerako gelan, 16:30etik 18:00etara.
- Biodantza Ana Zurutuzak gidatutako ikastaroa norbere buruarekin eta besteekin harremantzeko. Urbietan izango da apirilaren 24an, maiatzaren 1, 8 eta 29an, eta ekainaren 5 eta 12an (ostiralak), 17:00etatik 18:30era.
- Irrintzi tailerra Kultur nortasuna eta ahots-askatasuna lantzeko, Amaia Garcia Uriondok emango du tailer hau Batzar Aretoan. Maiatzaren 7an izango da, osteguna, 18:30etik 20:30era.
- Información extranjería (gazteleraz) SOS Arrazakeria taldeak atzerritartasun-zuzenbideari buruzko aholkularitza eskainiko du. Maiatzaren 13an, asteazkena, Udaletxeko sarrerako gelan, 17:00etatik 19:00etara.
Izen-ematea eta informazio praktikoa
Ikastaroetan izena emateko epea urtarrilaren 26an, astelehena, zabalduko da. Interesatuek esteka honetan eman behar dute izena.
Online prozesuarekin zailtasunak dituztenentzat, Udalak laguntza eskainiko du Berdintasun sailean, 943 02 80 50 edo 688 76 86 08 telefonoetara deituta, edota
Berdintasun Kontseilua, elkarlanerako gunea
Ekimena Berdintasun Kontseiluaren lanari esker egituratu da. Organo hau herriko emakume eta talde guztiei irekita dago, eta hilabeteko lehen astearteetan biltzen da Oriamendi kalea 18 behean dagoen lokalean. Herritarrak bertan parte hartzera gonbidatzen dira, berdintasun politika publikoak modu partekatuan eraikitzen jarraitzeko.