Bihar emango diote hasiera Beasaingo Usurbe Antzokian eta Ordiziako Herri Antzokian ospatzen den Antzerki Garaia zikloari. Guztira, 8 antzezlanek osatuko dute; sei euskaraz eta bi gaztelaniaz.
"Escape Room" antzezlanean, Zuhaitz Gurrutxaga, Nerea Gorriti, Iñigo Aranburu eta Oihana Maritorena aktoreak izango ditugu oholtza gainean. Irakurri hemen biharko emanaldiaren laburpena:
"Haurtzarotik lagunak diren bi bikotek hitzordu bat jarri dute elkarrekin escape room bat bisitatzeko. Escape rooma dagoen auzoan berriki zatikatutako gizon baten gorpua edukiontzi batean agertu da... Bildutako lau lagunek ondo pasatzeko jolas atsegin bat aurkitzea espero dute, euren adimena probatzeko eta barre egiteko hitzordu bat. Aldiz, gelan sartu eta atea hermetikoki ixten den unean bertan, atzerako kontaketa hasiko da: inork espero ez dituen gauza bitxiak pasatzen hasiko dira. Gelatik irtetea ez da ez erraza izango, eta jolasa bene-benetako infernu bilakatuko da, lau lagunen arteko adiskidetasuna mugara eraman eta kinkan jartzeraino.
Ez dirudien arren, Escape room komedia bat da: beldurrezko komedia bat!"
Bi aste barru, urtarrilaren 23an, "Etxea" antzerkiak hartuko du Ordiziako Herri Antzokia, Eneritz Sanchez, Iñigo Elosegi eta Iñaki Cid aktoreekin:
"Berrehun metro karratuko etxe baten aurrean aurkitzen gara. Sabai altuak, haritz egurrezko zoruak eta kaobazko ateak. Hemen ezkerretara egongela nagusia, lan prekarioaren ondoan Aurrerago beste egongela txikiago bat, inoiz lortuko ez dituzun ametsez betea. Sukaldea hor parean, bidean ahaztu zenituen lagunen jangelarekin konektatua. Bi komun, amak saldu duen etxean bezala, biak bainuontzi eta nostalgiaz ornituak. Dena oso argitsua, zure etorkizuna ez bezala. Hiriko teilatu guztiak ikusten diren hiru balkoi ditu: Itsaso, Pello eta Sebas. Gure protagonistak. Sukaldean amona, etxe honen jabe, zaintzaile eta presoa. Bizitzera sartzeko modukoa. Aukera paregabea."
Sarreren salmenta
Abonuen salmenta itxita dago dagoeneko eta sarrera solteak erosteko aukera egongo da hemendik aurrera 12 euroren truke. Antzokien salmenta puntu desberdinetan erosi ahalko dira, herri bakoitzari dagokiona: Usurbe Antzokia, Ordiziako Herri Antzokia.
Hauek izango dira bihartik hasita eta apirilera arte egongo diren antzezlanak. Emanaldi guztiak gaueko 20:20etan izango dira:
- 🎭 ESCAPE ROOM
- 📅 Urtarrilak 9 de enero
- 📍 Usurbe Antzokia
- 🎭 ETXEA
- 📅 Urtarrilak 23 de enero
- 📍 Herri Antzokia
- 🎭 DESOBEDIENTEAK
- 📅 Otsailak 6 de febrero
- 📍 Usurbe Antzokia
- 🎭 52 HERCIOS
- 📅 Otsailak 13 de febrero
- 📍 Herri Antzokia
- 🎭 R&J
- 📅 Martxoak 13 de marzo
- 📍 Usurbe Antzokia
- 🎭 KANDIDA
- 📅 Martxoak 27 de marzo
- 📍 Herri Antzokia
- 🎭 LOREEN HIZKUNTZA
- 📅 Apirilak 17 de abril
- 📍 Usurbe Antzokia
- 🎭 TRAJEA
- 📅 Apirilak 24 de abril
- 📍 Herri Antzokia