"Euskaraz kolpeka" lelopean, Euskararen Eguna ospatuko dute Beasaingo Melmak Gaztetxean datorren larunbatean. Errezitaldi musikatua eta bertso afaria antolatu dituzte gaztetxean bertan.
Egitaraua iluntzeko 20:30ean hasiko da, afaria baino lehen giroa berotzeko. Jon Eta Maialenek errezitaldi musikatua eskainiko dute.
Errezitaldiaren ondoren emango dute afaria eta, honen ostean, bertso saioa hasiko da. Lau bertsolari izango dira gaztetxean kantari: Julio Soto, Amets Arzallus, June Aiestaran eta Amets Zubizarreta. Azken biak, gainera, beasaindarrak dira.
Bertso afarira joateko asmoa dutenek aurrez eman behar dute izena, Gaztetxearen sare sozialen bidez edota Xuber tabernan. Afariaren prezioa 10 eurokoa izango da langabetuentzat eta 15 eurokoa langileentzat.
Aurrez ere antolatu izan dituzte euskararen aldeko ekintzak Melmak Gaztetxean. 2023an, esaterako, hitzaldi eta monologoa egin zituzten plaza azpian, hauek ere "euskaraz kolpeka" lelopean. Aurtengoan, ordea, Euskararen Eguna gaztetxean bertan ospatzea erabaki dute, herriko jendea bertara hurbiltzeko aukera izan daitekeela iritzita.