Beasaingo Udalak jakinarazi duenez, herri-guneko zenbait kaleren norabideak aldatuko dira trafikoa hobeto kudeatzeko. Batez ere, San Inazio eta Esteban Lasa kaleetatik N-1 errepiderako irteeran, Oriamendi kalea eta Mendeurren-Nafarroa Etorbidearen arteko bidegurutzean.
Norabide aldaketak
- Erauskin kalean norabide aldaketa egongo da. Plazatik gora egin beharko da eta 4. zenbakiko bidegurutzean elizarantz hartu ahal izango da eta Martina Maiz kaletik jaitsi Esteban Lasa kaleraino. Beasainmendira igotzeko aukera mantenduko da.
- Andre Mari kaletik gora doazen ibilgailuek eskuinera biratu beharko dute derrigorrez, Martina Maiz Kalera.
- Igartetxe kaleak goranzko norabidea izango du.
- Mendeurren etorbidearen bidegurutzea puntu beltza denez, Oriamenditik datorren trafikoak Irizargo biribilgunerantz egin beharko du. Horretarako, Nafarroa etorbidetik aurrera jarraitu beharko da; ezin izango da zuzenean Trenbide kalera iritsi. Mendeurren etorbideko 2Ako garajeetako erabiltzaileek, ordea, Trenbide kaletik sartu eta irten beharko dute.
'Kaixo eta agur' eremua
Zaldizurretako biribilgunearen segurtasuna eta erosotasuna hobetzeko bi aldaketa gauzatu dira:
- Kaixo eta agur izeneko geldialdi laburreko gunea sortu dute. Gehienez bi minutuko geldialdia egiteko aukera egongo da, pertsonak jaso eta uzteko denbora eta espazioa.
- Joan Iturralde kaleko autobus geltokia biribilgunean egokitu da. Aurreko kokalekuan trafikoan eragiten zuen eta orain espazio eroso eta seguruagoan eskainiko da geldialdia.
"Udalak gogorarazi du aldaketa hauek mugikortasun jasangarriaren aldeko estrategiaren barne daudela, bide segurtasuna, herritarren ongizatea eta trafikoaren kudeaketa eraginkorra hobetzea helburu."