Lau orduko lanuzteak deituta zituen urriaren 15erako ELA sindikatuak, gainontzeko sindikatuek deituta zituzten hiru ordukoetatik bereiztuz. Jarraipena zabala izan dela dio ELAk eta, "ondorioz, enpresei eta gobernuei (Gasteiz, Iruñea eta Madrilgoei) Israelekin dituzten harreman guztiak eteteko presioa handitu" dela.
Goizean lantoki kanpoaldeetan protesta egin dute langileek eta eguerdian Beasaingo plazan elkarretaratzea egin dute.
ELAren lehen datuen arabera, lanuztea erabatekoa izan da enpresa garrantzitsu hauetan: CAF, Indar, CIE, Hine eta Jaso Itsasondo. Zerbitzuen sektorean, grebak jarraipen berezia izan du Hezkuntzaren mendeko sektoreetan (jantokiak eta eskola garraioa), eta 4 orduko lanuzteari babes handia eman zaio azpikontrata publikoetan (hiri-garbiketa eta udal-eraikinen garbiketa, kirol kudeaketa...). Enpresa pribatuen azpikontratetan, jarraipena zertxobait txikiagoa izan da, baina CAFen garbiketetan erabat gelditzea lortu da, adibidez. Hezkuntzari dagokionez, Ordiziako Urdaneta, Beasaingo La Salle gelditu dira ELAren datuen arabera. Udaletan 4 orduko lanuztea Gipuzkoako zati handi batean masiboa izan dela adierazi dute, Beasain eta Ordiziakoak adibidez.