Beasaingo Udalak Oinezko Metroa aurkeztu du Europako Mugikortasun Astea ospatzen ari den honetan. Ekimen honek herritarren oinezko mugikortasuna sustatzea du helburu eta mapa Barrendain plazako geltoki pareko horman dago ikusgai. Mapak, udalerriko puntu nagusien arteko desplazamenduak oinez egiteko behar diren denborak jasotzen ditu eta metro-planoaren diseinua jarraitzen du.
Oinezko metroa 9 eta 16 urte bitarteko ikasleek eta hirugarren adineko herritarrek sortu dute elkarlanean, Madrilgo Unibertsitate Politeknikoko adituek dinamizatuta. Horrela, belaunaldi desberdinen iritziak jaso dituzte eta hauentzat garrantzitsuenak diren ibilbide eta leku esanguratsuenak irudikatu dituzte.
Zeintzuk dira toki esanguratsu hauek?
Igartzako jauregia, Loinazko San Martinen Basilika, Sagastiguti parkea, Kultur Etxea, Udaletxea, Murumendi eskola, Alkartasuna Lizeoa, La Salle ikastetxea eta Txindoki Institutua.
Gune hauen arteko ibilbideak egiteko denbora kalkulatzeko, 3,5km/h (adinekoen ibilera-tasa) eta 5km/h (helduen batez bestekoa) hartu dituzte abiadura gisa.
Udal gobernuak, oinezkoen metroak herritarrentzat eragin positiboa izango duela adierazi du: “Oinezko Metroak beasaindarren eskura jartzen du udalerriko puntu nagusien arteko distantzien eta denboren informazioa, oinez ibiltzea aukera eroso, azkar eta osasungarria dela erakusteko. Herritarrei tresna praktiko eta erabilgarria eskaintzeaz gain, mugikortasun ohiturak aldatzeko urrats garrantzitsua da, ingurumenarekiko errespetua eta bizi-kalitatea hobetuz.”
