Berdintasun Kontseiluak sustatuta, indarkeria matxistaren prebentziorako baliabideak egongo dira Loinatz Jaietan zehar. Bideluze plazan egongo da kokatuta Puntu morea eta prebentziorako edo kasuen artatzea egiteko dauden baliabideak jasotzeko euskarriak ediguneko tabernetan banatuko dira: kartela eta esku-orria.
Maiatzak 30, 31 eta ekainak 2, 6 eta 7an egongo da Puntu morea honako ordutegian:
- Maiatzak 30 eta 31: 22:00-01:00
- Ekainak 2: 18:00-21:00
- Ekainak 6: 22:00-01:00
- Ekainak 7: 21:00-01:00
Bertako langileek formakuntza espezifikoa dute indarkeria matxistaren alorrean, ikuspuntu feministatik, eta informazio-gune ere izango da, eraso baten edo bestelako egoera baten berri emateko aukera emanez.
Gainera, telefono bidezko bi baliabide publikora jotzeko aukera egongo da: Hariberria (900 840 188) eta SATEVI (900 840 111). " Hariberria sexu-indarkeriari arreta integrala eskaintzeko zerbitzua da, 16 urtetik gorako emakumeentzat eta euren inguruarentzat. SATEVI, berriz, emakumeen kontrako indarkeriaren biktima diren emakumeentzako informazio- eta arreta-zerbitzua da. Herritar orok jo dezake zerbitzu horietara.".
Larrialdi zerbitzuetara (112) edo Udaltzaingoetara (092) deitzeko aukera zabaldu du ere Udalak, batez ere eraso larriren bat gertatuz gero edo norbait bertaratzea beharko balitz.
Informazio hau eta beharrezko guztia banatu edo hartu daitezkeen eskuorrietan egongo da:
Jarraian, Beasaingo Berdintasun Kontseiluaren mezua:
Beasaingo Berdintasun Kontseilutik, jaiak era baketsu, alai eta parte hartzailean bizitzeko deia luzatu nahi dizuegu herritarrei. Beasaingo Berdintasun kontseilukideok aldarrikatu nahi dugun jai eredua inklusiboa, anitza, parte-hartzea ahalbidetzen duena, errespetuan oinarritua, librea eta berdintasunezkoa da, eta noski, eraso matxistarik gabekoa.
Eraso matxistak pertsonen askatasunaren eta duintasunaren aurkako eraso zuzenak dira; onartezinak dira, eta horregatik ez ditugu onartuko. Jaiak aske eta seguru bizi nahi ditugu, beraz, ez dugu onartzen erasotzaile batzuk jaia inpunitate gune bilakatu nahi izatea, esparru horietan erasotzen jarraitzeko. Erasoak ez dira jolas dibertigarri eta hutsal baten ondorio, indarkeria matxistaren ondorio baizik. Hori horrela, gertakari horiei aurre egiteko konpromiso aktiboa har dezazuela eskatzen dizuegu herritarrei. Ustezko gertaera txiki zein larriak, guztiak, gure herritik eta jaietatik desagerrarazi behar ditugu. Ustezko gertaera txikienen aurrean erantzuten badugu, muturrekoak diren egoerak prebenitzen lagunduko dugu. Beraz, jaietan sexu-eraso, eraso sexista edo jarrera matxistarik ikusiz gero, ez begiratu beste aldera, ez izan konplize eta aurre egin. Uneoro babestu biktima, ez zabaldu haren daturik eta zurrumurruak ekidin. Indarkeria matxistari aurre egitea denon ardura baita.
Berdintasun Kontseiluan emakumeen aurkako indarkeriari urteko 365 egunetan aurre egin behar zaiola uste dugu, ez bakarrik jaietan. Hortaz, urteko egun guztietan, herritarrok herriko edozein gunetan konpromiso aktiboa izan behar dugu, eta gure artean indarkeriarik gabeko eta berdintasunezko harremanak eraiki.
Bukatzeko, jaietan egingo diren ekintzetan eta ekitaldietan parte hartzera gonbidatzen zaituztegu. Eta dei egiten dizuegu zaintza eta etxeko lanen ardurak, erantzunkidetasunez, denon artean banatzeko, herritar guztiok baitugu eskubidea jai giroan murgildu eta ondo pasatzeko.
Gora Loinatz Jaiak!