Loinatz jaiak gerturatzen ari direla eta, prebentzio hitzaldiak emango dituzte Ertzaintzak eta Beasaingo Udaltzaingoak La Salle, Andramendi ikastola eta Txindoki institutuan. Udaltzaingoaren kasuan, agente tutore figuraren bidez emango da informazioa. Hitzaldiak DBH 3ko ikasleei zuzenduta egongo dira. Maiatzaren 14, 15 eta 16an emango dituzte.
Jaien testuinguruan ohikoak diren egoera arriskutsuei buruz kontzientziatzea da ekimen honen helburua. Alkohola eta drogen inguruko kontsumoa landuko da, baita kontsumoak sortzen dituen egoera ezberdinak, kontsumo mota ezberdinak, edari energetikoak, nahasketak, graduazioak, eroslekuak edota zigorrak ere. Bestetik, dokumentazioaren (NAN) kopia eramatearen garrantzia, borrokak, lapurretak edota sumisio kimikoa ere landuko dituzte. Bizikidetza gaiak ere aipatuko dira (musika eta zarata, pixa edonon ez egitea, zaborra jasotzea...).
Udaltzaingoko agente tutorea
Beasaingo Udaltzaingoaren aldetik, agente tutoreak eskainiko ditu hitzaldiak. Beasaingo Udaltzaingoaren barruan 2023an sortu zen Agente Tutorearen figura. Gazteen segurtasuna, ongizatea eta hezkuntza sustatzeko lan egiten du, prebentzioan eta bitartekaritzan zentratuta.