Mariren Jaitsieran elkartzen diren herritar kopuru handia ikusita, iaz dantzarien kopurua mugatzea erabaki zen, goiko plaza txiki gelditzen zelako. Aurten bide beretik jarraituko dute.
Oholtza gainean, aurten 17 urte betetzen dituztenek (2008an jaiotakoek) egingo dute dantza. Guztira, zozketaz aukeratuko 40 dantzari izango dira bertan.
Lehen zozketan aukeratuak izan ez direnek, plazan, lurrean, dantza egiteko aukera izango dute. Hauek, bigarren zozketa batean hautatutako 300 dantzari izango dira, izena eman dutenen artean aukeratuko direnak.
Zozketetan aukeratuak izan ez direnek beheko kalean (Kale Nagusian) izango dute dantzatzeko aukera.
Zozketa parte hartzeko sistema
Udalak bere web-orrian (beasain.eus-en) irekiko duen atalean eman ahal izango da izena. Izen-ematea apirilaren 30etik maiatzaren 4ra bitartean egin ahal izango da.
Zozketa maiatzaren 6an Arrano Kulturaren egoitzan egingo da. Hurrengo egunetik aurrera, zozketan parte hartu dutenek, “zozketa.beasain.eus/eus” helbidean NAN zenbakia sartuta kontsultatu ahal izango dute, oholtzan, lurrean edo Kale Nagusian tokatu zaien.
Edozein galdera, zalantza edo kexu adierazteko komunikazioa.arranokultura@gmail.com helbidera zuzendu beharko da.
Dantza entseguak
Aurtzaka Dantza Taldeak hiru entsegu-saio antolatuko ditu. Maiatzaren 9an eta 23an, Ezkiaga frontoian, 19:00etan, eta maiatzaren 30ean San Martin plazan, 20:00etan.
Maiatzaren 30eko entsegua baliatuko da oholtzan eta plazan dantza egingo duten dantzariei dagozkien zapiak banatzeko, 19:00etatik 20;00etara, plazako arkupeetan.