Beasaingo Udalak herriko ikastetxeetako ikasleentzat azokara bisitak antolatu ditu eta astearteetan bertan izango dira maiatzera arte. Helburu nagusia ikasleek azokaren funtzionamendua eta bertako ekoizle eta saltzaileen lana ezagutzea izango da. Horretarako, bertako produktuak ikusi, usaindu eta dastatzeko aukera izango dute. Gainera, kontsumo ereduak aztertu eta elikadura jasangarriaren inguruan hausnartuko dute, azokak herriko eta Goierriko ekonomian, ingurumenean eta kulturan duen eragina ulertuz.
Bisiten dinamika
Bisitei hasiera emateko, alkateak proiektuaren aurkezpena egingo du, azokaren garrantzia eta kontsumo arduratsuaren beharra azpimarratuz eta herriko ekonomian eta kulturan duen lortura azalduz. Ondoren, Josetxo Mendia ekoizlearekin batera azoka bertatik bertara ezagutuko dute, ekoizleak elkarrizketatuz euren lanei buruz gehiago ikasteko. Postu desberdinetan produktuak ikusi, usaindu eta dastatuko dituzte.
Bigarren zatian, kontsumo jasangarriari buruz hausnartuko dute, euren kontsumo ohiturak eta elikadura osasungarriaren eta bertako produktuen abantailak aztertuz. Rosa Aurkia ingurumen teknikariak eta Amaia Aierbe nutrizionistak gidatuko dute bigarren zati hau. Erronka bat osatuko dute taldeka: zabor gutxien duen eta ahalik eta osasuntsuena den hamaiketakoa prestatuko dute eta proposamenak mural batean islatuko dituzte.
Bukatzeko, azokako ekoizleen jakiak dastatuko dituzte, eta zentzumenak erabiliz, produktuen kalitatea, aniztasuna eta zapore eta usain bereziak antzemango dituzte.
Ekintza hau programa zabal baten barruan kokatzen da, non Beasaingo Udalak, herriko ikastetxeek eta Osakidetzak hilabeteak daramatzaten lanean, gazteen artean elikadura osasuntsua eta kontsumo arduratsua sustatzeko asmoz.