Goierriko erronka politiko, sozial eta ekonomikoei aurrea hartzeko estrategia lantzen hasi da EAJ alderdia, eskualdeko alderdiko ordezkariekin Beasainen burututako jardunaldian. Topaketa honetan, GBBko eta Beasain, Ataun, Idiazabal, Lazkao, Legazpi, Legorreta, Ordizia, Ormaiztegi, Segura, Zaldibia, Zegama eta Urretxu-Zumarragako alderdikideek parte hartu dute, etorkizuneko ekintza-ildoak aztertzeko eta lantzeko.
Hiru helburu nagusi
Etorkizunerako plan honek hiru helburu nagusi izango ditu. Batetik, Gipuzkoako lehen indar politikoa izatea, EAJren posizioa indartuz esparru politikoan. Bigarrenik, aldaketa eta berrikuntzaren eragile izatea, gizartearen behar berriei erantzunez eta ikuspegi irekia mantentzeko konpromisoarekin. Azkenik, abertzaletasunaren etorkizuneko erronkei erantzun nahi die EAJk, ikuspegi euskaldun, ireki eta zabalago batetik lan eginez eta modernitatearen eta tradizioaren arteko oreka bilatuz.
Gipuzko Buru Batzarreko presidente berriak, Maria Eugenia Arrizabalagak, adierazi duenez, "gaur egungo politika globalean populismoak eta demagogiak dakartzaten arriskuak nabarmenak dira, eta Gipuzkoa ere ez dago salbu. Are gehiago, fenomeno horiek polarizazioa eta desinformazioa sor ditzakete. Horren aurrean, benetakotasuna eta errealismoa defendatzen ditu EAJk".
Beasainen burututako topaketan, Arrizabalagak konpromisoa hartu du gizarte, kultura eta ekonomia esparruetan sare berriak sortzeko, "etorkizuneko abertzaletasunaren ikuspegi irekia" ardatz. Gainera, herrigintza eraginkorra egiteko beharra azpimarratu du, epe motzeko arazoei erantzunez eta aldi berean ikuspegi estrategikoa izanez. Horrela, batetik, eskualdea indartu eta herri txikien erronkei erantzun egokia emateko beharra azpimarratu da eta, bestetik, alderdiaren ikusgarritasuna eta abertzaletasuna suspertu eta dinamizatzeko ekimenak landu dituzte.