Beasaingo Udalak eta Dar-Dar gizarte ekimenak antolatutako ekitaldi honetan, ‘Zulo beltza’ ikuskizuna ikusi eta ondoren honi buruzko gogoeta egingo da bi orduko saio parte hartzaileetan. “Egungo gizartean geroz eta garrantzi handiagoa hartzen ari den osasun emozionala zaindu eta prebenitzeko helburuaren baitan antolatu den ekimen honek, pertsonen ongizate integralean eragin zuzena izatea da asmoa” adierazi du Udalak.
Ikuskizunak gaixotasun mentalak eta hauen inguruan gure gizartean dagoen tabua eta sortzen duten gizarte bazterkeria lantzen ditu eta antsietatea, depresioa, tristura sakona, eskizofrenia eta suizidioa bezalako gaiak irudikatuko ditu. Era honetan, herritarrek gaiaren inguruan dituzten kezkak eta beldurrak azaleratzeko helburuarekin, Udalak hauetan parte hartzeko gonbitea zabaldu du.
Hauetara bertaratzeko, izena ematea beharrezkoa izango da aldez aurretik GALDETEGI HAU osatuz, info@dar-dar.eus helbide elektronikora idatziz edota 626 91 63 74 zenbakira deituz. Saio guztiak arratsaldeko 18:30ean izango dira Aranealde eraikinean (Erauskin kalea, 5).