CAFeko Zuzendaritzarekin Europako Batzordearen osaera eta funtzionamendua herrialde desberdinetako 15 ordezkarik osatuko dute; hala nola, Euskal Herria, Espainiako Estatua, Polonia, Frantzia, Italia, Lituania, Letonia, Txekiar Errepublika eta Suedia.
“Zuzendaritzaren politika espantsionistaren ondorioz, CAFek 12.000 langile baino gehiago ditu Europako 19 lurralde desberdinetan. Enpresaren egoitza nagusia Beasainen dago, eta langile gehienak, 5.000tik gora, Euskal Herrian kokatzen dira. Espainiako Estatuko gainontzeko lurraldeetan, CAFek 2.300 langile inguru ditu, eta Polonian 2.500 inguru. Frantziako Estatuan, CAF taldeak 1.000 pertsona inguru ditu, Suedian bezala; Italian, berriz, 350 langile baino gehiago. Horri gehitu behar zaizkio Alemania, Austria, Belgika, Danimarka, Grezia, Hungaria, Letonia, Lituania, Luxenburgo, Herbehereak, Txekiar Errepublika, Eslovakia eta Errumaniako ordezkaritzak eta filialak.”
Euskal multinazional baten ahotsa
LABek Euskal Herriak ‘ahots propioa’ izatea ezinbestekoa dela defendatu du eta euskal multinazional baten Batzorde Europarrean, estatuen araberako antolaketa huts baten ondorioz euskal langileon ordezkaritza disolbatuta gelditzea ulertezina dela dio.
Prozesu horretan, Espainiako Estatuko sindikatu ofizialistek interes korporatiboak defendatzen dituztela argi eta garbi dagoela adierazi dute ere: “Sindikatu txikienen parte-hartzea, estaturik gabeko nazioena edo Komite eredu sozialago bat izatea, oztopo dira sindikatu mota horiek bilatzen dituzten interes propioentzat. Patronalaren interesak ere noski, ez dira bat etorriko era honetako Komite eredu batekin."
Langileen interesak defendatzeko, LABek Europako Enpresa Batzorde parte-hartzailea, soziala eta internazionalista bultzatuko duela eta CAF taldeko Euskal Herriko, Espainiako Estatuko eta Europako sindikatuekin aliantzak bultzatzen jarraituko dutela aditzera eman dute ere.