Beasaingo udal eraikinen mendeurreneko ospakizunen harira, urriaren 25ean, gaueko 20:30ean, ZirKuSS Konpainiaren 'Sustrai' ikuskizuna doan eskainiko dute Usurbe Antzokian. Sarrerak doakoak izango dira eta ostiral honetatik (urriak 4) aurrera erreserbatu ahal izango dira lehiatilan ohiko ordutegian. Horretarako, izen-abizenak eta harremanetarako datuak eman beharko dira.
SUSTRAI
"Sustrai", ikuskizun berritzaile bat da. Iragana, oraina eta etorkizuna erabiliz bidaiatzeaz gain, hauekin ere jolasten duena. Bertan, gainera, zirku garaikideaz gain, arte plastikoen zuzeneko erakustaldia ere eskaintzen da. "Sustrai"-k, era berean, zirkuko artisten, Miren Barrena artista plastikoaren eta herritarren arteko elkarrizketa sinbolizatzen du. Eszenatokira kezka eta beldur desberdinak eramaten dira, baina baita, bakoitzaren istorioa, jakinduria pertsonala eta, batez ere, aurrera egiteko gogoak. Zirkua, akrobaziak, dantza eta antzerkia elkar lotuz, bederatzi artistek osatzen duten ikuskizuna da.
