Bi aste barru amaituko dituzte udalerriko argiteria LED sistemara aldatzeko obrak. Urte hasieran esleitu zituzten Nafarroa Etorbide amaiera eta kiroldegiaren arteko eremuan dauden kale-argiak aldatzeko lanak eta guztira 245 izango dira eremu honetan aldatuko diren argiak.
Kalkuluen arabera aipatutako eremuan aldaketa egin baino lehen kontsumoa 130.410 kW urteko da, ondoren, 50.060 kW urteko izango da (aurrezpen energetikoa 80.350 Kw urteko, %61). Hau da, aurrezpen ekonomikoa urteko 18.400€ izango da. Kontuan izanik esleipen prezioa 126.495,54 € (BEZ barne) izan dela, inbertsioaren amortizazio epea 7 urtekoa izango da.
Herriko kale argiteriaren ia erdia baino gehiago aldatu ditu Udalak dagoeneko, gehien kontsumitzen duten argiak lehentasun izanik. Aurreikusita dago urte amaierarako udalerriko beste eremu batean argi aldaketa egitea.
Jasangarritasuna eta ingurumenaren alde
LED argiteria sistemek hiru abantaila nagusi eskaintzen dituzte: energia kontsumo txikiagoa, bizitza luzeagoa eta ez dituzte material toxikorik erabiltzen fabrikazio prozesuan.
LEDen energia-eraginkortasun handiago honek karbono isuriak murrizten lagundu eta energia-iturri berriztagarrien erabilera sustatzen du. Gainera, gutxiago ordezkatu behar diren heinean ez dituzte hainbeste hondakin sortzen eta garraio prozesuetan baliabide gutxiago kontsumitzea dakar. LED argiak sortzerako orduan ez dute merkurioa erabiltzen eta ingurumenarentzako kaltegarriak izan daitezkeen substantziak saihesten dira.
Aspektu hauek kontutan hartuta, LED argiteria sistemak jasangarriagoak dira ingurumenaren aldetik, baliabideak hobeto erabiliz eta karbono aztarna murriztuz.