Urtero legez, Beasaingo Loinatz Jaietako azken igandea dantzari eskaintzen dio Ostadar taldeak eta aurten ere, Dantza Topaketen Eguna ospatuko dute.
XXII. edizio hau berezia izango da Ostadarrentzat, izan ere, 40 urte betetzen ditu aurten taldeak eta ekitaldia “elkarrekin eta elkarrentzat dantzan egin eta jarraitzeko aldarri bar izango dela” adierazi dute, euren bidea hasi zutenak omenduz eta gogoan izanez.
Maiatzaren 19an Ostadar taldeko hainbat kide izango dira bertan: azken lau hamarkadetan izandako eta gaur egungo dantzariak, Plaza dantzen ikastaroko kideak, haur dantzariak eta taldea osatzen duten musikariak. Gainera, ez dute bakarrik ospatuko; Gasteizko Adurtza Dantza Taldeak aurten 50. urteurrena ospatzen du eta festara batuko dira ere.
Egitaraua
Goizeko 10:45etan Kale Nagusitik, Nafarroa Etorbidetik eta Igartza auzotik abiatuko dira dantza-kalejiran talde desberdinak eta 12:30etan Erauskin plazan elkartuko dira. Ondoren, Kale Nagusian barrena dantzatuko dute 13:30etan Bideluze Plazan amaitu arte. Arratsaldean festa jarraituko dute.
*Eguraldiak lagunduko ez balu, goizeko dantza-kalejirak Nafarroa Etorbideko frontoian eta Loinazko San Martin plaza azpian egingo dira.
Ostadar Dantza Taldeak herritar eta dantzazale guztiak animatu ditu parte hartzera eta ospakizunaz gozatzera.
Ver esta publicación en Instagram
