Ostiral honetan hasiko diren Beasaingo Loinatz jaiek herriko egunerokotasunean aldaketak ekarriko ditu, noski. Beasaingo Udaltzaingoak aldaketa hauek eta festez arazorik gabe gozatzeko gomendioak biltzen dituen oharra kaleratu du.
TAO zerbitzua bertan behera
Maiatzak 11, 13, 14 eta 18an TAO zerbitzurik ez da izango. Gainera, Gipuzkoa plazako aparkalekua bertan behera geratu da “barrakak” jarri baitira. Aparteko aparkaleku bezala, Renfeko nasan dauden aparkalekuak erabil daitezke, Bernedoenea ondoan.
Trafiko aldaketak
Erdigunea oinezkoentzako izango da. Beraz, ibilgailuen trafikorako itxita egongo da, baimenduentzako izan ezik. Osasun Zentrotik herrirako sarbidea ere itxita egondo da. Zaldizurreta kaleko bidegurutzea Ordiziarantz itxita egongo da datozen egun eta orduetan:
- Maiatzaren 10an : 18:00etatik hurrengo goizalderarte.
- Maiatzaren 11an: 18:00etatik hurrengo goizalderarte.
- Maiatzaren 12an: 17:00etatik hurrengo goizaldera arte.
- Maiatzaren 13an: 13:00etatik 15:30etara eta 18:00etatik hurrengo goizalderarte.
- Maiatzaren 17an: 18:00etatik hurrengo goizalderarte.
- Maiatzaren 18an: 11:00etatik goizalderarte
- Maiatzaren 19an: 17:00etatik 22:00etara
Lapurretak
Festetan diru-zorro eta sakelako telefonoen lapurretak ugaritzen direnez, hainbat gomendio eman ditu Beasaingo Udaltzaingoak. Bereziki tabernetan eta jende-pilaketak izaten diren guneetan erne ibiltzeko eskatu die herritarrei eta kanpotik datozenei.
Poltsak itxita eta aurrealdean eramatea gomendatu dute, begi-bistan. Diru-zorroak eta sakelako telefonoak aurreko poltsikoetan gordetzea ere aholkatu dute.
Azkenik, zerbait susmagarria nabarituz gero, Ertzaintza edo Udaltzaingora jotzea eskatu dute.
Lehergaiak
Beasaingo Udaltzaingoak gogorarazi du kalean lehergaiak botatzea debekatuta dagoela. Gainera, lehergaiak baimendutako saltoki berezietan erosi behar dira eta erabat debekatuta dago petardo edo antzekoen salmenta ibiltaria.
Udaltzaingoaren ordutegia
Aurtengo festetan Udaltzaingoaren ordutegia ondorengoa izango da: maiatzaren 10, 11, 13, 17 eta 18an, hau da, bi asteburuetan eta kuadrillen egunean, zerbitzua 24 ordukoa izango da. Zeregin nagusienak eraso sexualak, borrokak eta antzeko ekintzak saihestea izango dira.
Edozein larrialdi izanez gero 112 telefono zenbakira edo Udaltzaingoaren telefono zenbakira (943 02 80 80) deitzea eskatu dute.
