Atzo arratsaldean, Itaiak deitutako elkarretaratzea egin zuten Beasaingo Bideluze plazan, aste honetan ezagutzera eman diren gertakariak salatzeko.
Pasa den asteazkenean atxilotu zuten Beasaingo 23 urteko gazte bat haur pornografia eduki eta zabaltzea leporatuta. Polizia Nazionalak adierazi duenez, bideo horietan, adingabeak "heldu batekin sexu-jarduerak egiten" agertzen dira.
Barne Ministerioaren esanetan, Madrilgo Ziberdelinkuentzia Unitateko Adingabeak Babesteko Taldeko agenteek Gipuzkoako etxebizitza batetik "gogortasun handiko artxibo pedofiloak deskargatzen eta partekatzen ari zirela" ikusi zutenean ekin zioten pertsona honen ikerketari.
Erabiltzaile horren Interneteko zerbitzuen hornitzaileak aztertu ondoren, Beasaingo etxebizitza geolokalizatu eta zerbitzuaren titularra identifikatu zuten. Epaileak poliziari ikertuaren etxebizitzan sartzeko baimena eman eta momentu horretan atxilotu zuten.
Etxea aztertu ondoren, agenteek “telefono mugikor batean artxibo pedofilo ugari zituela antzeman zutela” egiaztatu zuten.
Donostiako Probintzia Komisariara eraman ondoren, momentuan Tolosako Instrukzio Epaitegiaren esku dago gaztea eta auzia ikertzen ari dira.