Badira sei urte Beasaingo Udala eta CITA-Alzheimer Fundazioa elkarlanean ari direla herritarren osasun kognitiboa hobetzeko helburuarekin. Bide honetan, aurten, bigarren aldiz, Exercita programa jarriko dute martxan.
Exercita programa 60 urtetik gorako beasaindarrei dago zuzenduta, kognitiboki osasuntsu daudenak edo memoria arazo arinak dituztenak. Parte-hartzaileek estimulazio kognitiboko programa bat burutuko dute. Sei hilabeteko iraupena izango du eta lau modalitate izango dira:
- ExerCita modalitate klasikoa: estimulazio kognitiboko liburuko jarduerak bakarrik egingo dira etxetik, sei hilabetez, astean hiru saio eginez.
- ExerCita Plus Presentzialaren modalitatea: liburua eta tailer presentzial bat egingo dira hilero Beasainen, programak irauten duen sei hilabeteetan (sei saio).
- ExerCita Plus on line modalitatea: dinamika modalitate presentzialaren berdina izango da baina bideo-dei bidez egingo da.
- ExerCita nahieran modalitatea: liburuko jarduerak egiteaz gain, saio bakoitzeko gaiei dagozkien edukiak plataforma digital batera igoko dira, aurkezpenekin eta laburpen-bideoekin.
Sei hilabeteko programa honek funtzio kognitiboak landu, indartu eta mantentzea du helburu. Zer diren ulertu eta gure egunerokotasunean bakoitzaren garrantziaz jabetzen gaitu. Profesionalen jarraipenarekin, zalantzak partekatu eta argituko dira.
Informazio hitzaldia
Interesa duten herritarrei informazioa helarazteko, hitzaldi bat egingo dute datorren ostegunean, hilak 11, goizeko 11etan, Usurbe Antzokian. 60 urtetik gorako beasaindar guztiei gutuna bidali zaie bilerara gerturatzeko gonbidapena luzatuz.
Informazio gehiago lortu edo izena emateko, egin klik hemen, idatzi exercita@cita-alzheimer.org helbidera edota deitu 943 021 792 zenbakira